Наполи повторно е во идентична ситуација како во октомври 2020 година и можно е пак да не патува за Торино, за дуелот со Јувентус закажан за утре од 20.45 часот.
Објавено е дека фудбалската експедиција на Наполитанците, во која треба да е и Елиф Елмас по негативниот тест на ковид-19, има закажан лет за Торино во 16 часот денеска.
Но, поради големиот број заразени играчи, Наполитанците очекуваат да добијат забрана за патување, нешто што се случи и во октомври 2020 година, во случај што предизвика многу реакции.
Комисијата задолжена за пандемијата со ковид-19 во областа Кампања тогаш и буквално ја врати експедицијата на Наполи од пат кон Торино.
Мечот првично беше регистриран со службен резултат од 3:0 за Јувентус, но по жалбата на Наполи, сепак мечот се играше подоцна.
Еден натпревар од 20-тото коло во Италија што комплетно треба да се одигра утре е одложен, а во Салерно нема да играат Салернитана и Венеција. Домашната екипа има дури 10-мина позитивни на тестирањето за ковид-19 и целата екипа е испратена во карантин.