Јувентус во недела го очекува можеби најтешкиот предизвик сезонава во Серија А, гостува кај Наполи во дербито од рамките на 26-тото коло. Во составот на Макс Алегри најверојатно ќе недостасува Кристијано Роналдо, кој заработи ситна повреда против Болоња и нема да ризикува, но „старата дама“ секако ќе оди да го улови целиот плен на „Сан Паоло“.
Капитенот Џорџо Кјелини се закани дека со остварување на триумф, ќе му го зададат последниот нокаут на Наполи и воедно ќе можат да остварат 16 бода предност на табелата на 12 кола пред крајот на шампионатот.
„Сакаме што побрзо да ја решиме шампионската трка и да покажеме дека не случајно сме на врвот на табелата. Ќе биде тежок дуел, како и секогаш кога играме едни против други. Јасно ни е на сите дека со триумф ќе му го зададеме последниот нокаут на Наполи“, истакна Кјелини.
Јувентус е на врвот на табелата со 69 бода по 25 средби во Серија А, додека втор е Наполи и има 56 бода. По ова дерби, Јуве на осми март игра на домашен терен со Удинезе, потоа следува реваншот со Атлетико Мадрид во ЛШ, одлучувачкиот меч во кој „старата дама“ ќе треба да надополни два гола негатива ако сака да се најде меѓу осумте најдобри екипи во Европа.
