По девет години поминати како тренер на Ливерпул, Јирген Клоп ќе си замине од „Енфилд роуд“ на крајот од сезонава. Германскиот стратег изненади многумина кога објави дека решил ова да биде негова последна сезона на клупата на англискиот гигант.
Под водство на клоп, Ливерпул освои трофеи во четири различни натпреварувања (Премиер лигата, ФА Купот, Лига Купот и Лигата на шампиони) и воопшто немаше дилема дека челниците на овој клуб воопшто не размислуваат да го заменат во скоро време. Сепак, самиот Клоп одлучил дека е дојдено време за нов предизвик.
Запрашан за тоа дали може некогаш повторно да се врати во Англија и да биде тренер во некој друг клуб, освен Ливерпул, Клоп имаше екстремен одговор.
„Можам да ви ветам дека никогаш нема да водам друг клуб во Англија. Дури и да умирам од глад, никогаш нема да седнам на клупата на друг англиски клуб“, рече Клоп. Тоа значи дека во иднина Клоп може да го гледаме во некое друго силно првенство или ќе чека шанса да стане селектор.
