Екипата на Ливерпул со 3:1 го совлада Њукасл и со тоа остана во борбата со Манчестер сити за шампионската титула во Англија.
Екипата на Јирген Клоп иако губеше, на крајот успеа да ги намести работите во своја корист и да обезбеди важни три бода.
Сепак, многумина ги зачуди одлуката на германскиот стратег да го промени најдобриот играч на овој тим, Мохамед Салах, кој во 74-тата минута го напушти теренот.
Претходно Египќанецот даде гол во 25-тата минута, со што го израмни рекордот на Џејми Варди постигнувајќи гол или асистирајќи на 15 натпревари по ред.
„Одлуката да се замени Салах беше правилна бидејќи за три дена играме нов натпревар.
Мораме да ги чуваме силите во овој згуснат распоред. Мо е навистина фантастичен играч и неговите асистенции се важни колку и погодоците“, кратко изјави тренерот на Ливерпул.
„Црвените“ од Енфилд сега имаат 40 бода, односно еден помалку од првакот Манчестер сити, а во наредното коло треба да играат против Тотенхем, но поради ситуацијата со корона-вирусот ковид-19 сè уште е неизвесно дали таа средба ќе биде одложена.
