Дербито на „Стемфорд бриџ“ уште вечерва може да го донесе новиот шампион на Англија во зависност од резултатот. Евентуална победа на Челзи ќе се слави и во Ливерпул бидејќи Црвените и математички ќе ја имаат обезбедно титулата во Премиер лигата по 30 години чекање.
Тимот на Клоп вчера си ја заврши работата со Кристал палас и сега се чека исходот од вечерашната средба, па сега останува Лампард и неговите играчи во нивно име да ја довршат работата, но за актуелниот европски првак доволно е и реми.
Германскиот стратег посочи дека ќе го проследи дербито, но не затоа што очекува триумф на Челзи, туку ќе го анализира следниот противник на неговата екипа, а тоа е токму Манчестер сити.
„Секако дека ќе го гледам дербито, бидејќи наш следен противник е Манчестер сити. Јас сум професионален и морам да си ја вршам работата, а дел од неа е и анализирањето на противниците“, истакна Клоп.
Челзи и Сити вечерва во 21:15 часот ќе ги одмерат силите во рамки од 31-вото коло во Премиер лигата.
