Ливерпул како лидер на табелата во Премиер лигата, денеска ќе гостува кај Нотингем Форест во меч на кој тренерот на гостите има големи проблеми околу составот. Дури деветмина повредени играчи има Јирген Клоп, а меѓу нив се и Мохамед Салах, Александер-Арнолд, Диого Жота, како и голманот Алисон Бекер.
Бразилскиот чувар на мрежата на Ливерпул има мускулна повреда, а Клоп вели дека се работи за посериозна повреда, а не како што првично се мислеше.
„Тоа не е повреда која може да се санира за кратко време. Во моментов Алисон е во фитнес сала, а ќе видиме кога ќе се приклучи на тренинзите со остатокот од тимот“, рече Клоп.
Ливерпул има 60 бодови, а веднаш зад него се Манчестер сити со 59 бодови и Арсенал со 58 бодови. На овие тимови може само опасност да им биде уште и Астон вила која има 52 бодови на четвртото место на табелата.
