Дуелот на Ливерпул и Манчестер јунајтед е дерби на денот во Европа и меч кој не треба да се пропушти, а тренерите на двата тима ја вжештуваат атмосферата со провокативни изјави со кои се палат играчите и навивачите.
Германецот Јирген Клоп, од своите играчи ќе бара кога ќе се појават на терен, да делуваат налутено. Иако разликата помеѓу двата тима е дури 16 бода, и Јунајтед е поблиску до зоната за испаѓање отколку од врвот, „црвените ѓаволи“ се најопасни ако бидат потценети.
„Изгледа дека тие не се во најдобра форма, загубија во ЛШ од Валенсија, но и ние си имаме проблеми. Ја знаеме целта, ќе се бориме за трите бода. На терен ќе бидеме налутени, мора да имаме таков пристап“ – изјави Клоп.
Ливерпул дома не загубил од Манчестер од 2013 година.
Жозе Мурињо, во 2005 како тренер на Челзи, имал дуел со Ливерпул кој тогаш беше европски првак, а денеска ќе има дуел со Ливерпул кој не е актуелен европски владетел.
„Овој тим на Ливерпул нема освоено ништо. Не знам дали е подобар од тој во 2005, но тогаш беа европски прваци, сега не се. Кога сте на врвот, се чувствувате среќно, така мислам дека и Ливерпул е многу среќен, многу работи им одат како што посакуваат. Знаеме како победија против Евертон и Наполи, со Борнмут поведоа од офсајд“ – потсетува Мурињо.
