Светската фудбалска куќа, ФИФА, подготвува нов фудбалски земјотрес. Нивниот план предвидува следното Светско клупско првенство во 2029 година да се игра во Катар, земјата која веќе организираше зимски Мундијал.
Секако, и клупското првенство би се играло во зима, сред сезона, што воопшто не им оди во прилог на екипите. Планот е да се игра во текот на цел декември или евентуално по 15-тина дена во декември и јануари.
Претставниците на Фудбалскиот сојуз на Катар, како и државни функционери од оваа земја на Блискиот Исток, се наоѓаат во САД и веќе наголемо комуницираат со ФИФА околу оваа идеја.
Освен Катар, во моментов нема друга кандидатура за организација на следниот клупски Мундијал, а ако се имаат во предвид и парите кои се вртат во тој дел од светот, нема да биде изненадување доколку ФИФА наскоро и официјално му ја додели организацијата на Катар.
