Деклан Томпсон го имаше своето деби во професионалниот фудбал откако заигра за Шефилд вензди во дуелот против Ексетер сити во ФА купот. Дебито на Томпсон немаше да има никакво значење ако не се знае дека тој како дете можел да остане во инвалидска количка и да не може да оди.
Кога имал само пет години, Томпсон заболел од Пертесова болест. Тоа е ретка болест која ја зафаќа бутната коска и најчесто доведува до деформација, големи болки, па дури и до инвалидитет. Малиот Деклан дури 18 месеци морал да помине во инвалидска количка за да не ја оптоварува ногата. Лекарите првично не биле оптимисти и дури велеле дека малото дете може никогаш да не може да оди според тоа како напредувала болеста.
Сепак, Деклан не се откажал од борбата и сега тоа му се исплати.
„Кога бев мал, играњето фудбал беше единствената работа која ме правеше среќен. Затоа никогаш не се откажав. Беше тешко, се борев со многу проблеми и болки, но секој таков момент ме направи да бидам посилен“, се присетува Томпсон.
Денеска тој е амбасадор за „Чекори“, организација која им помага на децата кои имаат проблеми со моториката на телото.
„Сакам да им покажам дека сè е можно. Никогаш не смеете да се откажете. Јас никогаш немаше да станам фудбалер ако размислував да се откажам“, советува Деклан.
Дури кога наполнил 11 години, лекарите му дозволиле на Томпсон да се занимава со секакви активност, па и трчање, планинарење и играње фудбал со другарите. Сепак, и тоа не било крај на проблемите. На 14 години повторно имал проблеми. Започнал да губи кондиција, му се вратиле симптомите и повторно тешко се движел.
И покрај сите проблеми, Деклан продолжил со терапиите, а потоа успеал да ја врати кондицијата и да ги победи болките. Продолжил да тренира во Шефилд јунајтед, а пред неколку дена, на 18 години дебитираше. Кога татко му виде дека Деклан е подготвен да влезе во игра, заплака од среќа.
Emotional scenes when our assistant manager Lee Thompsons son Declan comes on for @swfc in @EmiratesFACup to makes his debut! @BBCMOTD @adam3oxley @AlanBiggs1 @ThomasFeaheny @Ollie_Bayliss pic.twitter.com/ptzfbWPslN
— Stocksbridge PSFC (@parksteelsfc) January 9, 2021
„Татко ми ме носеше на секој меч и на секој тренинг. Пред мене не ги покажува емоциите, но знам колку многу ми значи ова. Многу е цврст и тоа го имам наследено од него. Во неговите очи видов дека е горд на мене. Што е мојот сон? Да останам во Шефилд. Сакам да ме памтат навивачите на овој клуб“, заврши тинејџерот кој доби една многу важна битка и сега почнува да го живее фудбалскот сон.
