Кога денеска би биле завршени квалификациите за фудбалското СП 2022, македонската репрезентација би учествувала во бараж и би имала шест потенцијални противници во полуфиналето. Патот до Мундијалот во Катар е прилично долг и ќе треба да се добијат два меча за да се стигне на СП.
Во баражите, во март следната година ќе има 12 репрезентации, а од нив само три ќе се најдат на СП. Десет тима ќе влезат во бараж преку квалификациите, а два според најдобар рејтинг во Лигата на нациите. Шест тима ќе бидат носители при ждрепката и тие ќе бидат домаќини во полуфиналето, кое ќе се игра само на еден меч на 24 или 25 март 2022.
Во моментов шесте носители би биле: Србија, Шведска, Хрватска, Швајцарија, Шкотска и Полска. Ова може да се смени во последното коло, но, секако, Македонија би имала тешка задача да победи на гости кај некоја од овие селекции. Чешка, Норвешка и Украина се другите три тима кои во моментов се со помал број бодови и би гостувале во полуфиналето, додека преку Лигата на нациите би биле Велс и Австрија.
Како и да е, прво да го победиме Исланд, па потоа ќе чекаме исход од ждрепката за да дознаеме кои ќе ни бидат последни две пречки на патот до СП.
