Црвена ѕвезда против Динамо Загреб сигурно би било идеално за сите навивачи на овие два клуба од поранешна СФР Југославија. Во минатото, овие клубови, кои беа во заедничка лига, имаа одиграно многу неизвесни дерби-дуели. Сега е можно повторно да гледаме мечеви меѓу овие клубови доколку тоа го одреди денешната ждрепка во Нион, кога ќе бидат познати групите за Лигата на шампионите.
Динамо е во третиот барабан, а Ѕвезда во четвртиот, што само потврдува дека постојат шанси за вакво сценарио. Освен дерби-дуелите меѓу овие два клуба, можно е да има и група во која покрај Динамо и Црвена ѕвезда, би се нашле два европски гиганти.
Од првиот барабан сигурно меѓу посакуваните атрактивни противници се актуелниот првак Ливерпул, германскиот шампион Баерн, потоа Барселона, ПСЖ… Во вториот барабан има клубови од типот на: Реал Мадрид, Атлетико Мадрид, Борусија Дортмунд, Тотенхем, Ајакс…
Ако треба да одбереме група која би била по мерак за навивачите на Ѕвезда и Динамо, тоа би била: Ливерпул, Реал Мадрид, Динамо и Ѕвезда или Барселона, Борусија Дортмунд, Динамо и Ѕвезда. Ждрепката за групната фаза од ЛШ е вечерва во 18 часот, па останува да видиме дали навистина е можно едно од овие сценарија.
