Белгиецот Еден Азар летово би можело да го напушти Реал Мадрид и да замине во новиот англиски премиерлигаш Барнли.
Овие шпекулации се засилија откако вчера тренерот на Барнли, Винсан Компани, изјави дека не мисли дека Азар е за во пензија и дека веќе нема што да понуди на фудбалските терени. Инаку Азар ја наследи капитенската лента во белгискиот национален тим токму од Компани.
Азар додека играше за Челзи, беше голема ѕвезда и играше врвно, но по трансферот во Реал Мадрид од 115 милиони евра и бројните повреди, оди само по надолна линија и во Реал нема на што да се надева освен на дремење на клупа, особено ако тренер остане Карло Анчелоти. Но, Азар има и голема плата (над 2 милиони евра месечно бруто) и постојано изјавува дека не сака да си оди од Кралскиот клуб.
Барнли, за кој сезонава како позајмен од Шалке повремено настапува и нашиот Дарко Чурлинов, на убедлив начин се пласира во Премиер лигата и веќе размислува за засилувања кои се повеќе од потребни за достојно презентирање во моментно најсилната лига на светот.
