Баерн Минхен има феноменален старт на сезоната. Во 16 меча одиграни во сите натпреварувања германскиот гигант има исто толку победи. Во првенството на Германија, Баерн е со девет триумфи од девет кола и сега е на чекор од израмнување на еден рекорд поставен од времето на Пеп Гвардиола.
Шпанскиот стратег кога беше на чело на баварскиот гигант имаше сезона во која стартуваше со 10 победи по ред. Сега, Баерн со Венсан Компани на чело ќе се обиде да го повтори тој подвиг. Компани вели дека не е засегнат многу да ги руши рекордите, туку да освојува трофеи.
„Не се фокусирам на рекорди, подобро би победил во финале отколку да соборам рекорд. Но, победивме на многу натпревари и станува збор за менталитетот: 16 победи по ред мора да ви дадат самодоверба. Многу пати кажав дека Пеп одигра многу важна улога во мојата кариера како играч и во мојот развој како менаџер. Не разговаравме многу од почетокот на летото. Тој е навистина зафатен обидувајќи се да се врати на врвот на Премиер лигата. Но, редовно сме во контакт, па ќе разговараме повторно во одреден момент“, вели Компани.
Баерн в сабота ќе гостува во Берлин против Унион и е голем фаворит, но не треба да се заборави дека минатата сезона баварскиот гигант на ова гостување одигра само 1:1. сезонава, Унион има само еден пораз во пет меча пред своите навивачи.
„Силата на Унион на домашен терен е толку очигледна. Тие се компактен тим, сите нивни играчи се силни во одземањето и трчањето, имаат многу искуство, се бранат добро кога центрираат и ве ставаат под притисок веднаш кога ја имате топката. Тие се слични на Келн по тоа што имаат слични колективни предности – многу се храбри и компактни. Исто така, нивните напаѓачи постигнуваат многу голови. Имаат многу самодоверба и со оглед на нерешениот резултат против нас минатата сезона, ќе бидат целосно мотивирани. Ќе биде возбудлив предизвик како нашиот натпревар против Пари Сен Жермен. Затоа мора да се подготвиме ментално за тоа“, рече Компани.
