Арсенал го пречекува Баерн Минхен во меч на екипите кои се на првите две позиции на табелата во Лигата на шампионите. Двата европски гиганти досега имаат перфектен учинок, а вечерва имаат меѓусебна пресметка во Лондон.
Тренерот на Баерн, Винсан Компани, со многу почит зборуваше за тренерот на Арсенал, Микел Артета, и тоа што Шпанецот го прави во англискиот тим.
„Кога гледам како Микел го развил својот тим и себеси, гледам дека играат со одлична физичка подготвеност. Тој работи со големо внимание на деталите и во тимот има многу малку слабости. Тоа е природата на Артета. Тој одигра голема улога во Арсенал и сè што кажувам сега е она што го кажав претходно, кога бев со Барнли тука. Тој беше голем дел од тренерскиот штаб (во Манчестер сити). Пеп Гвардиола беше архитектот и имаше експерти зад него кои му даваа повратни информации. Артета беше еден од нив. Кога си замина, никој не беше изненаден што може да стане менаџерот што е сега. Се радувам на предизвикот“, рече Компани.
Баерн Минхен веќе успешно помина еден голем предизвик во ЛШ, а тоа беше гостувањето во Париз против Пари Сен Жермен, кога германскиот гигант славеше на „Паркот на принцовите“ со 2:1.
„Ги добивме нашите први четири натпревари, што беше важно. Досега го постигнавме она што го зацртавме и се надеваме дека тоа може да продолжи. Но, натпреварот против овој тим ќе биде најтешкиот со кој сме се соочиле во моментов. Среќни сме поради тоа – затоа сме тука, тоа е она што го сакаме“, коментира тренерот на Баерн во пресрет на денешниот дерби-дуел.
