Венсан Компани истакна задоволство по победата на Баерн Минхен со 1-2 против Реал Мадрид во првиот четвртфинален натпревар од Лигата на шампионите. Баварците славеа на стадионот „Сантијаго Бернабеу“, што им дава сериозна психолошка предност пред реваншот.
„Секоја победа на „Бернабеу“ е одличен резултат. Можеме да надградиме врз неа, а следниот натпревар го играме на домашен терен. На моменти тие беа неверојатно опасни, погледнете го нивниот квалитет, но и ние останавме да се закануваме до крајот. Сега нашата цел е да продолжиме понатаму и да победиме и дома.
Секој може да избере кој е најдобар голман на сите времиња, но Мануел Нојер е еден од ретките што можат да го прават тоа на врвно ниво многу, многу долго време. Да се игра на ваков начин на оваа возраст е исклучително тешко. Не знам како било да се работи со него на 30 години, но тој навистина е импресивен. Потребни се посебни изданија на ова ниво во вакви натпревари. Имавме шанси да постигнеме уште голови. Се надевам дека ќе ја продолжиме оваа форма и следната недела… и дека нашите напаѓачи ќе бидат најдобрите играчи.
Зависи од клубот и од Мануел дали ќе продолжи на неговите години. Нема да коментирам за тоа. Најважно е она што го видовме од него. Имам чувство дека е во одлична форма и ни е потребен, не само поради неговото искуство, туку и поради квалитетот. Реагираше во многу тешки моменти од натпреварот. Но, не сум изненаден ако се земе предвид неговиот пристап на тренинзите“, изјави Компани.
Тој смета дека сепак ќе следи тежок и неизвесен реванш во Минхен.
„Ништо не е завршено. Немаше причина за еуфорија, со оглед на важните натпревари што следуваат. Ако моите момчиња победат следната недела, можеби тогаш ќе почувствувам вистинска радост. Во Баерн имавме голема почит кон противникот. Свесни сме колку голем клуб и тим е Реал Мадрид, но важно беше и што претставуваме ние и што значеше оваа победа за нашите играчи“, дополни тренерот на Баерн Минхен.
