Кина забележа победа од 2-1 против селекцијата на Киргистан во нивниот премиерен меч во Азискиот Куп. На тој начин, Кинезите го скршија мразот како првиот фаворит кој успеа да забележи позитивен резултат, претходно четири фаворити потфрлија во тој обид.
Избраниците на Марчело Липи мораа преку пресврт да стигнат до првите бодови во континенталниот репрезентативен собир. Киргистан дојде до предност пред крајот на првото полувреме преку Исраилов, а по автоголот на Матјас и погодокот на Ју Дабао во 70-тата минута Кина го осигура славјето
Претходно, домаќинот Соединетите Арапски Емирати ремизираше на отворањето против Бахреин (1-1), потоа Јордан го шокираше бранителот на трофејот Австралија со 1-0, Индија го фрли на колена Тајланд со 4-1, а Сирија испушти бодови против Палестина во ремито без голови.
