Интер освои само еден бод во првото коло, и тоа на свој терен во Лигата на шампионите, откако одигра 2:2 против Борусија Менхенгладбах. Нераѕурите дури може да бидат и задоволни затоа што со гол во 90-тата минута се спасија од пораз. Вечерва Интер гостува кај Шахтар, кој изненадувачки славеше во Мадрид против Реал со 3:2.
Тренерот на Интер, Антонио Конте, не ја крие желбата да освои важен трофеј со Интер, но потенцира дека за тоа е потребно време.
„Не сакам да брзам со коментарите дека ние сме фаворити за освојување на некој трофеј. Секогаш сум велел дека во Интер дојдов за да донесам трофеи и да ги израдуваме навивачите. Тоа што минатата сезона го постигнавме во Лигата на Европа е искуство повеќе за нас. Стигнавме до финалето од ЛЕ, а сега нашиот фокус е насочен на Лигата на шампионите. Лукаку и Лаутаро се одличен тандем во нападот, имаме добар тим и Интер треба да се врати на старите позиции во европскиот фудбал“, рече Конте, кој сигурно ќе се обиде да направи тактика за освојување на трите бода од гостувањето во Украина.
