Кошаркарот на Будуќност, Французинот Алфа Каба, заврши во Клиничкиот центар во Подгорица откако вчера се онесвестил додека чекал на шалтер во банка.
Според очевидци, Каба во еден момент паднал на подот и со главата удрил во влезната врата на банката. Вработените во банката веднаш повикале брза помош, која пристигнала за десетина минути, по што кошаркарот е пренесен во Клиничкиот центар во Подгорица.
„Членот на нашиот тим Алфа Каба во текот на вчерашниот ден почувствува слабост и падна во бесознание, по што му беше укажана медицинска помош. Каба добро се чувствува, а по деталните лекарски прегледи ќе биде позната причината зошто му се слошило“, соопшти тимот на Будуќност.
Иако првичните испитувања покажуваат дека сè е во ред со кошаркарот, навивачите на Будуќност се загрижени бидејќи Каба се онесвестил и на втори октомври за време на тренинг.
Каба досега одигра два натпревари за Будуќност во АБА-лигата и му даде пет поени на МЗТ Скопје Аеродром, а 18 на Цедевита Олимпија.
