Кошаркарската репрезентација на Македонија за играчи до 20 години го одигра последниот меч во подготвителниот период за настапот на Европското првенство во Ерменија, а противник на младите македонски кошаркари беше селекцијата на Косово.
Мечот во Качаник заврши нерешено, 69-69, што е несвојствено, со оглед на тоа дека во тој случај би требало да се играат пет минути продолжение, но се чини дека причината е катастрофалната арбитража на косовските судии, кои досудиле неверојатни девет технички грешки против Македонија.
„Ќе кажам само тоа, ни беа досудени дури девет технички грешки за време на натпреварот во кој одлучив да ги поштедам Лукановски и Зетов, а многу малку во финишот на средбата, играше и Стојковиќ, како трет од стартната петорка која ја имавме на првиот меч во Скопје.“ – вели селекторот Горан Самарџиев.
Пред два дена во Скопје, во меч на истите селекции, Македонија славеше убедливо со 71-59.
