Сезоната за Реал Мадрид заврши со тежок пораз од Пари Сен Жермен во полуфиналето на Светското клупско првенство. Шпанскиот гигант беше декласиран со 0-4 од освојувачот на Лигата на шампионите и првпат од 2021 година останува без ниту еден освоен трофеј.
Кралевите не доживеале ваков пораз од 26 октомври минатата година, кога беа поразени со ист резултат 0-4 од Барселона во Ла Лига. Во текот на сезоната, Реал претрпе уште два порази со најмалку три гола разлика, 2-5 повторно од Барса во шпанскиот Суперкуп и 0-3 против Арсенал во Лигата на шампионите.
Во сите натпреварувања оваа сезона, Реал прими вкупно 84 гола, со што го израмни антирекордот во историјата на клубот од сезоната 1998/99.
Овој пораз беше прв под водство на новиот тренер Чаби Алонсо. Дополнително, ова беше трет пораз за Реал во последните пет натпревари против ПСЖ.
