Реал Мадрид ја продолжи трката со Барселона за врвот во Ла Лига, откако на „Сантијаго Бернабеу“ убедливо го совлада Елче со 4-1 во 28-то коло.
Со оваа победа, Кралскиот клуб стигна до 66 бода и се наоѓа на второто место на табелата, само еден помалку од Барселона, која има и натпревар помалку пред дуелот со Севиља.
Домаќините долго време не успеваа да го скршат отпорот на гостите, но во 39-то минута Антонио Рудигер со силен волеј од околу 11 метри ја затресе мрежата за водство од 1-0. Само неколку минути подоцна, во 44-та минута, Федерико Валверде постигна прекрасен погодок со удар од далечина и го зголеми водството на 2-0.
Во второто полувреме Реал Мадрид рутински ја контролираше играта, а во 66-та минута дефанзивецот Дин Хаусен со удар со глава погоди за 3-0.
Гостите успеаја да намалат во 85. минута, а конечните 4-1 ги постави Арда Ѓулер во 89-та минута со спектакуларен удар од повеќе од 60 метри.
