Португалската мега ѕвезда Кристијано Роналдо би можел да заигра за бразилски клуб на Светското клупско првенство следниот месец, пишува шпанска „Марка“.
Роналдо не освои никаков трофеј со Ал-Наср сезонава, и што е уште полошо, не успеа да се квалификува во азиската Лига на шампиони за следната сезона и ќе игра само во саудиската лига и куп.
Недостатокот на успех предизвика турбуленции во клубот, јасно е дека амбициозниот Ронадо не е среќен, а 40-годишниот напаѓач веќе добил супер понуда која не се одбива лесно и тоа не од европските гиганти, туку од Бразил.
Инвеститори од Бразил кои сакаат да го видат Роналдо на Светското клупско првенство, ги здружиле силите и ќе се обидат да го привлечат најпопуларниот спортист на светот и прв стрелец во историјата на фудбалот.
Името на клубот не е објавено, но јасно е дека е еден од четирите што ќе учествуваат на СКП, а тоа се Палмеирас, Фламенго, Флуминенсе или Ботафого.
Влијанието на КР7 многукратно го зголеми интересот за саудискиот фудбал, но се бараат и резултати, а нив ги нема. Потфрлија Ал-Наср и Ал-Хилал, па сега дилемата кај Кристијано е дали да прифати да игра за клуб од Бразил со што би му се отворила вратата за настап на Светското клупско на ФИФА кое првпат ќе се одржи ова лето.
