Најтрофејниот европски клуб Реал Мадрид утре ќе гостува во Бергамо кај Аталанта, тим кој од минатата сезона е едно од најпријатните изненадувања во Европа. Реал има многу проблеми со повредени играчи, но тоа е клуб кој никогаш не се предава.
Тони Крос веќе неколку години е дел од Реал и знае како се освојуваат и европски титули. Германскиот интернационалец знае дека против Аталанта ќе биде многу тешко да се победи и дека италијанскиот тим сака да игра офанзивно и дека Реал ќе мора и да се брани.
„Без разлика што ни недостасуваат неколку важни играчи, ние мора да го дадеме најдоброто од нас. Секогаш се обидуваме да го контролираме мечот и да го задржиме поседот на топката, но овојпат ќе се соочиме со екипа која игра поинаку. Ќе биде тежок дуел, но тоа веќе го знаеме. Секој дуел е како финале. Лигата на шампионите дури сега започна. Нема да ни биде лесно против екипа која игра добар фудбал и сака да напаѓа. Свесни сме дека мора и да се браниме“, вели Крос.
