Српскиот селектор Младен Крстајиќ ги „издрибла“ претставниците на Барселона кои дојдоа во Лисабон да го гледаат младиот напаѓач Лука Јовиќ. За разлика од дуелот со Германија, кога Јовиќ беше стартер и даде гол, овојпат за гостувањето кај Португалија, Крстајиќ го изостави Јовиќ и го остави на клупата, а со тоа ги разочара скаутите на Барса, кои џабе допатуваа во Лисабон.
Голгетерот на Ајнтрахт е цел на Каталонците, но и за Баерн Минхен. Ерик Абидал, како човек на Барселона задолжен да го „скенира“ Јовиќ, остана изненаден и со празен простор во тефтерот. Стартер во нападот беше Александар Митровиќ, а Јовиќ воопшто не доби шанса.
„Исклучен сум од сите овие шпекулации за мојата иднина. И во минатото ми се правеше притисок поради слични работи. Ја научив лекцијата и сега поинаку гледам на работите. Моја задача е на секој меч да давам максимум и да бидам најдобар на теренот. Добро ми оди сезонава, се надевам дека ќе продолжам така“, изјави 21-годишниот Јовиќ чија цена според „Трансфермаркет“ е 50 милиони евра.
