Мексиканскиот фудбалски гигант Круз Азул на доминантен начин ја освои својата седма титула во КОНКАКАФ Шампионскиот куп откако во финалето во Мексико сити го декласира канадскиот Ванкувер вајткепс со убедливи 5-0.
Капитенот Игнасио Риверо го отвори резултатот уште во осмата минута, а само по 20 минути Лоренсо Фаравели го удвои водството. До полувремето сè веќе беше решено – Анхел Сепулведа и Матеуш Вогуш ја зголемија предноста на 4-0. На почетокот на второто полувреме, Сепулведа со удар со глава го постави конечниот резултат.
Со овој триумф, Круз Азул се израмни со Клуб Америка на врвот на листата на најуспешни клубови во 60-годишната историја на турнирот, со по седум освоени титули. Покрај трофејот, Мексиканците обезбедија пласман на Светското клупско првенство, како и место во новоформираниот Интерконтинентален куп.
