Калиду Кулибали, дефанзивецот на Наполи, оценил дека за него е подобро да остане во Наполи отколку зимаво да направи трансфер во Манчестер јунајтед. Во последниве две сезони Сенегалецот постојано е цел на гигантот од „Олд Трафорд“, но Манчестер постојано останува со празни раце кога се работи за доведување на овој фудбалер.
Вредноста на Кулибали се проценува на околу 100 милиони евра, сума која Манчестер и може да ја плати за фудбалерот кој во таков случај треба да стане најскапиот одбранбен играч. Наполи има договор со Кулибали уште три и пол сезони, што значи дека тешко може да ја намали сумата која ја бара за трансфер на овој играч.
Наполи сезонава не игра на посакуваното ниво. По 21 одигран меч, Наполи е на 10-тото место на табелата само со 27 освоени бодови и заостанува дури 24 зад лидерот Јувентус. Манчестер во Англија е на петтото место со 34 бода од 24 средби и е во трка за позиција која води излез во Лигата на шампионите за следната сезона. И покрај тоа што Јунајтед го бара во своите редови, Кулибали реши да остане во Наполи.
