Сите во Барселона сакаат што е можно побрзо да ја заборават сезоната во која не освоија ниту еден трофеј. Еден од оние кои ќе ја имаат главната улога во доведување на нови трофеи на „Камп ноу“ е Роналд Куман. Некогашниот холандски репрезентативец и играч на Барселона, сега како предводник од клупата, треба да состави тим за победи.
Во првото поопширно интервју, Куман вели дека е среќен што повторно се враќа на „Камп ноу“, место кое го смета за свој дом.
„Барселона ми е како дом. Бев тука како играч, а сега сум тука како тренер и тоа ме прави многу среќен. Без разлика дали си играч, тренер или служител во Барселона, најважно е што треба да знаеш е дека тоа е најдобриот клуб во светот. Сите ние имаме многу среќа што сме тука“, вели Куман.
Холандскиот сратег вели дека посебно внимание ќе посвети на дисциплината и одговорноста. Што се однесува до тимот, Куман е среќен што го има Лионел Меси во составот, но свесен е дека Аргентинецот не може сè сам да направи.
„Јас сум тренер којшто сака екипите во коишто работи да му бидат дисциплинирани и организирани. Сакам да доминираме на мечевите и да играме напаѓачки фудбал. Задоволство е што го имаме Меси во тимот. Неговиот квалитет сигурно многу ќе ни помогне. Сепак, не може да се потпреме само на неговите квалитети“, вели Куман.
