Пари Сен Жермен запиша историска победа од 7-0 против Брест во плејофот на Лигата на шампионите, поставувајќи нов рекорд во европските клупски натпреварувања.
Еден од најдобрите играчи на вечерта, Квича Кварацхелија, изрази задоволство од настапот на тимот и ја потенцираше нивната желба за освојување на титулата.
„Докажавме дека сме тим кој знае да победува. Секогаш влегуваме на теренот со цел да триумфираме. Да се постигнат седум гола против Брест, навистина e големо достигнување и уште една потврда дека сме подготвени за најголемите предизвици. Нашата крајна цел е трофејот од Лигата на шампионите и ќе дадеме сè од себе за да го освоиме“, изјави Кварацхелија по натпреварот. Тој го носи прекарот Кварадона од периодот кога го носеше дресот на Наполи.
Ова е најубедливата победа на ПСЖ во европските натпреварувања, надминувајќи ги претходните рекорди – 7-1 против Гент во Интертото купот (2001) и Селтик во Лигата на шампионите (2017). Во историјата на клубот, нивниот најголем триумф останува победата од 10-0 против Кот Шо во Купот на Франција во 1994 година.
