Поранешниот холандски репрезентативец Квинси Промес е екстрадиран од Дубаи во Холандија, соопшти холандското обвинителство. Екстрадицијата следува откако тој беше осуден на шест години затвор за соучесништво во шверц на над едeн тон кокаин.
Промес беше прогласен за виновен поради учество во увоз на 1,363 тони кокаин од Бразил во 2020 година. Пресудата беше изречена во февруари 2024 година од страна на холандскиот суд.
Во посебен случај, 33-годишниот фудбалер претходно доби казна затвор од 18 месеци и парична оштета, поради инцидент во кој со нож го повредил својот братучед за време на семејна расправија. Двата случаи се сè уште предмет на жалбени постапки.
Портпаролка на обвинителството истакна дека Промес е во тек на транспорт кон Холандија, потврдувајќи ги наводите на локалните медиуми.
Тој беше уапсен во Дубаи во март 2024 година, но тогашните информации укажуваа дека станува збор за локално прекршување на законот, без поврзаност со холандските случаи. Според јавниот сервис „НОС“, повикувајќи се на руски извори, Промес бил приведен на аеродром поради бегство од место на сообраќајна несреќа.
Во текот на својата репрезентативна кариера, Промес има 50 настапи за Холандија и постигнати седум голови. Последен пат настапи на Европското првенство во 2020 година, каде Холанѓаните беа елиминирани од Чешка во осминафиналето.
Во 2019 година, Промес премина од Севиља во Ајакс за 15 милиони евра, а во 2021 се врати во московски Спартак, каде настапуваше и од 2014 до 2018 година и беше прогласен за најдобар играч во руската лига.
