Распад на системот му се случи на Реал Мадрид против Манчестер сити. Граѓаните за пет минути успеаја да го свртат резултатот и да триумфираат со 2-1 на „Сантијаго Бернабеу“ во првата пресметка меѓу двата гиганти. Мирното прво полувреме беше најава дека темпото ќе се засили во вториот дел.
Први се заканија Кралевите преку Иско во 61-та минута, но тоа беше знак дека гостите од Манчестер ќе се потрудат барем да израмнат, а го сторија тоа во 78-мата минута преку Жесус. Само пет минути подоцна следуваше нова казна за тимот на Зидан, Сити доби пенал кој го изведе и реализира Де Бројне, па може да се каже дека Белгиецот е режисер на пресвртот ако се знае дека асистираше за израмнувањето.
Домаќините испровоцирани наместо да се потрудат да избегнат пораз, Рамос во 86-тата минута направи опасен прекршок како последен играч во одбраната и доби директен црвен картон.
Втората вечерашна средба се одлучи со еден гол, Лион славеше со минимални 1-0 против Јувентус благодарение на погодокот на Тусар во 31-вата минута. Составот на Маурицио Сари покажа разочарувачко издание и упати само еден удар во рамките од голот на домаќините од вкупно 15 обиди.