Кошаркарската женска репрезентација на Македонија до 16 години претрпе дебакл од Холандија на стартот од Европското првенство за кадетки во Дивизијата Б. Нашите претставнички загубија со огромна разлика од 77 поени при конечен резултат од 101:24.
Во почетните 10 минути Македонките постигнаа само два поени, што никако не беше одговор на разиграните Лалиња кои реализираа 27 поени. Резултатот од 54:5 на полувремето беше најава дека нашата женска селекција ќе претрпи тежок дебакл, иако во третиот период покажаа знаци на живот реализирајќи 14 поени.
Следен противник на македонските кадетски репрезентативки ќе биде националниот состав на Бугарија, која, пак, ја запиша првата победа во групната фаза по триумфот над Украина со 67:63. Дуелот е закажан за сабота, со почеток во 17:15 часот.
