Ландо Норис им испрати силен удар на Оскар Пјастри и на Макс Ферстапен во трката за титулата во Формула 1 во 2025 година, откако ја оствари својата втора последовна и седма победа сезонава, триумфирајќи на Гран при на Сао Паоло.
Британскиот возач на Мекларен доминираше од самиот старт до целта на „Интерлагос“ и се справи со хаосот кој се случуваше зад него. На второто место заврши Андреа Кими Антонели, кој во последните кругови мораше да се брани од Ферстапен, кој стартуваше од пит-лејн.
Холанѓанецот имаше спектакуларно возење, повторувајќи го успехот на Себастијан Фетел од Абу Даби 2012, кога исто така заврши трет, стартувајќи од алејата пред боксот. Четирикратниот светски шампион го постигна тоа и покрај три застанувања во бокс, додека речиси сите други возачи имаа по две.
На четвртото место заврши Џорџ Расел од Мерцедес, кој, слично на Антонели, се бранеше во последните кругови, но од Пјастри, кој на крајот остана петтопласиран. Возењето на Австралиецот беше отежнато со казна од 10 секунди поради инцидентот со Антонели и Шарл Леклер по рестартот на шестиот круг.
Шести заврши Оливер Беарман од Хаас по уште едно одлично возење, а седми беше Лијам Лоусон со Ред Бул. Во зоната на поени се најдоа и Исак Хаџар, Нико Хулкенберг и Пјер Гасли.
