Барселона ги договори сите услови со Чави Ернандес, но останува уште да добие дозвола од неговиот актуелен клуб Ал-Сад. Катарскиот клуб инсистираше лично претседателот на Барселона, Жоан Лапорта, да пристигне на преговори, но првиот човек на Каталонците ја одби оваа варијанта.
Според најавите кои Лапорта ги испрати од Киев, каде што Барселона вечерва ќе игра во Лигата на шампионите против Динамо, на преговори во Катар ќе заминат двајца негови луѓе од доверба. Лапорта е уверен дека лесно ќе биде склучен договор за Барселона да плати еден милион евра компензација на Ал-Сад за предвремено раскинување на договорот на Чави.
Од Ал-Сад се надеваа дека Лапорта ќе пристигне и дека ќе склучат договор за соработка, но и за одигрување на пријателски меч. Сепак, ова тешко дека ќе се случи, а Чави треба да биде пуштен да се врати на „Камп ноу“.
Според најавите, Чави в четврток ќе биде наименуван за нов тренер на Барселона, а со работа ќе започне дури по завршување на репрезентативната пауза која сега следи. Се очекува Чави да го има дебито како тренер на Барселона на 20 ноември, во градското дерби против Еспањол.
