Анадолу Ефес приреди пријатно изненадување на стартот од Ф4 турнирот на Евролигата кој се игра во Виторија, Шпанија. Во дуелот со градскиот ривал Фенербахче, Анадолу славеше со убедливи 92:73 и тие се првите финалисти. За оваа екипа ова е прво финале во клупската историја, а за титулата ќе се борат благодарение на извонредното издание на Шејн Ларкин и Василије Мициќ.
Избраниците на Ергин Атаман покажаа „заби“ уште на стартот од средбата, а по неизвесноста во првиот период кој припадна на Фенер (20-19), кошаркарите во сини дресови ја презедоа иницијативата. По паузта, Анадолу продолжи во ист ритам, Ларкин и Мициќ ја разбиваа одбраната на противникот, а дополнителни проблеми правеше и Андерсон од линијата за три поени.
Распадот на европскиот првак од 2017 година беше очигледен откако Анадолу во последните 10 минути влезе со +11 поени предност, а на три минути до крајот стигнаа и до највисоките +21.
Извонредната партија Ларкин ја круниса со 30 поени, 7 скока и 7 асистенции. Мициќ додаде 25 поени, додека Андерсон заврши со 10 поени. Од редовите на Фенербахче, Весели беше најсветла точка со 14 поени, а 13 поени додаде Грин.