Селекторот Кирил Лазаров не губи надеж дека Македонија може да ја помине групната фаза и да се пласира во главната рунда на Мундијалот во Полска и Шведска. Лазаров признава дека Норвешка и Холандија се подобри од нас, но и тоа дека Македонија на овој Мундијал дојде со помладен состав.
„Честитки за Холандија, заслужено победија. Не сум задоволен, но дојдовме да направиме една победа, имаме уште една шанса, против Аргентина. Не сум задоволен, факт е дека Норвешка и Холандија во овој момент се подобри од нас. Ја сменивме генерацијата дојдовме со млад тим, не со ѕвездите со кои игравме до пред шест месеци. Ќе се мобилизираме, мора да победиме против Аргентина. Ќе заборуваме со играчите, видовме каде сме, тоа е ситуацијата, Мора да се одмориме и да пробаме да се пласираме во главната рунда“, вели Лазаров, кој потенцира дека сепак Холандија не е посилна од Македонија за 10 голови.
„Можеме да научиме многу, Холандија е подобра, но не со десет гола разлика. Мора да играме тимски, како што игравме денеска. Во 43 минута беше четири гола разлика, исто беше со Норвешка, се повтори. Можеме да изгубиме еден меч, но мора да имаш карактер. Тоа го немавме во двата меча, мора да се смениме за следната средба“, изјави Лазаров на прес-конференцијата по мечот.
Македонија против Аргентина ќе игра во вторник.
