Ракометната репрезентација на Македонија нема реални шанси за пласман во четвртфиналето на Светското првенство, но последните два меча со Катар и со Франција треба да се одработат максимално, а утре против азискиот тим ни е шансата да извојуваме победа.
Селекторот Кирил Лазаров смета дека во македонскиот тим владее позитивно расположение и тоа треба да се пренесе на терен против Катарците утре од 15.30 во Вараждин.
„Мора во позитивно расположение да се подготвиме и да настапиме против Катар, немаме друг избор. Кај момците владее одлична, позитивна атмосфера. Вчера Митревски бранеше со температура, Јагуриновски остана во хотел, Костески и Велковски имаа проблеми, но како за сите така и за нас, утре попладне ќе пробаме да одиграме квалитетен меч“, изјави Лазаров.
