Македонскиот претставник Алкалоид во сабота (18 часот) на домашен терен, во салата „Автокоманда“ ќе го пречека Бриксен во осминафиналниот реванш-натпревар од ЕХФ Европскиот куп.
Четвртфиналето е веќе на прагот, со оглед на тоа дека на гости Алкалоид славеше со 32-44.
„Неочекувано извојувавме висока победа над еден ривал од Италија, земја во која ракометот на репрезентативно и на клупско ниво е во подем. Се одлепивме во последните неколку минути и стигнавме до убедлива победа. Момците одиграа одлично и сега сакам и очекувам да победиме и во реваншот. Добро сме подготвени, ривалот е квалитетен, но ние сме подобри и тоа треба да го потврдиме на теренот“, изјави тренерот Кирил Лазаров.
Мартин Велковски исто така очекува нов триумф со поддршка од фановите.
„Ривалот е добар, игра ракомет во висок ритам, но ние сме поквалитетни. Очекувам да имаме поддршка и од нашите навивачи и на крајот да се радуваме на нова победа“, истакна Мартин Велковски.
