Селекторот и играч на македонската ракометна репрезентација, Кирил Лазаров, по победата во Скопје од 30-22 рече дека мора да бидеме претпазливи и да не се слави многу како да е завршено бидејќи задутре претстои реванш во Романија, каде што нема да биде лесно.
„Беше прекрасно повторно да се игра со многу публика, имавме одличен противник. Можеби резултатот не е реален, но спортот е таков, треба да се игра 60 минути. Овојпат ние бевме тие што беа подобри во последните минути. Многупати сме биле добри 45 минути и сме губеле. Имавме поширока ротација за разлика од ЕП и мислам дека тоа беше клучот. Треба да бидеме претпазливи познавајќи го нивниот селектор Пасквал, знам дека нема да се предаде“, изјави Кирил Лазаров.
„Немаше да биде ваков резултатот ако атмосферата не беше ваква. И минатиот пат отидовме во Романија со голема разлика, па таму одвај поминавме, треба да играме како да било нерешено“, рече Филип Миркуловски.
