Селекторот Кирил Лазаров во пресрет на првиот дуел од ЕП 2026 во Хернинг игра со моќната Данска. Данците ќе имаат поддршка од трибините, тие се тим кој е актуелен светски и олимписки првак.
„На првиот меч играме против најдобриот тим на светот во последните десет години, тоа е Данска. Возбудени сме што ќе играме против нив. Тие се домаќини, ќе ни биде многу тешко, но немаме што да загубиме на овој меч и ќе се обидеме да уживаме.
Разговарав со моите млади играчи на кои ова им е ново искуство, ќе играат против земја во која се сака ракометот и кој им е можеби број 1. Во другите земји фудбалот е најпознат спорт, и тука во Данска фудбалот е популарен, но ракометот е на прво место.
Најважно е што смената на генерации ја правиме постепено, чекор по чекор, тоа е тежок процес и посилни селекции имаат проблем со смена на генерации. Ние сме мала земја, мора да бидеме трпеливи. Во претходните две години покажавме дека можеме да одиграме по еден добар меч, а за да имаме континуитет, во иднина треба да одиграме добро не само еден меч на Светско или на Европско првенство, потребно е секој втор ден да играте добро.
Искрено, секој има амбиции и сака да победува натпревари. Имаме многу тешка група, играме против Данска во Хернинг, исто така против Португалија, која на последното СП беше во полуфинале, ги победија Египет, Шпанија и Иран. И Романија е добар тим со голема традиција, во последно време се подобруваат. Сакаме да одиме во втората фаза, но секој сака“, рече селекторот Лазаров.
