Фудбалерите на Милан со минимални 1-0 славеа над Лацио во најинтересниот меч од саботната програма на Серија А. Единствениот гол беше дело на Рафаел Леао во 51-вата минута, а тоа значи дека Милан најмалку 24 часа ќе биде лидер во Серија А.
Екипата од Милано сега има 28 бода, бод повеќе од Рома и два од Наполи, екипи кои во недела навечер играат меѓусебе, па на „Олимпико“ ќе се одлучува дали ќе има промени на врвот.
Длабоко во судиското продолжение беше досуден пенал за Лацио, но по долго разгледување на ВАР, одлуката беше дека гостите нема да добијат пенал, а иако беа покажани пет минути продолжение, второто полувреме се играше неверојатни 59 минути.
За Милан ова беше 12-тиот меч во серија без пораз во Серија А, а на осум од нив успеаја да победат.
