Легендарниот дефанзивец на Динамо Загреб, Славко Иштваниќ, се закани дека ќе стапи во штрајк со глад ако не му биде исплатен долгот. Тој настапувал за Динамо од 1983 до 1995 година и, како што вели, последните години од договорот не му се исплатени.
Проблемот настанал во 1993 година, кога Динамо се трансформирал од здружение на граѓани во акционерско друштво, а тој имал потпишано договор со здружението. Клубот од Загреб во тие години по распадот на Југославија најпрво го менува името од Динамо во ХАШК Граѓански, а потоа и во Кроација Загреб, пред да врати старото име кое го има и денес.
Иштваниќ за долгот тужел и го добил Динамо на суд во 1997 година, но и покрај тоа, никогаш не бил исплатен.
„Подготвен сум да одам во клубот и нема да излезам од таму додека не се реши проблемот. Тоа се мои пари и нема да се откажам. Ќе штрајкувам со глад ако треба. Мојот син има 29 години, боледува од церебрална парализа и зависен е 24 часа од туѓа нега, ова го правам за него. Ова е моја борба за да му помогнам нему. Се надевам дека нема да има потреба да штрајкувам со глад и дека луѓето во клубот ќе имаат срце и разбирање. Верувам дека претседателот Зајец и неговите соработници ќе ми помогнат“, вели Иштваниќ.
Се работи за сума од 75.000 евра, но и законска камата од 1997 година до денес.
