Иако уште не се знае дали Драган Стојковиќ ќе остане селектор на фудбалската репрезентација на Србија или ја напушти функцијата, „фрчат“ понуди на заинтересирани тренери кои би седнале на селекторското место, ако Пикси биде разрешен пред 2026 година до кога има договор со ФСС.
Неофицијално, во кругот на кандидати е и 70-годишниот германски стручњак Феликс Магат кој ги има водено Херта, Шандонг, Фулам, Волфсбург, Шалке, Баерн, Штутгарт, Ајнтрахт, Вердер, Нирнберг и Хамбургер. Последниот ангажман на Магат беше во Херта во 2022 година.
Доколку ФСС не успее да најде соодветен странец подготвен за кормилото на Орлите, ќе се насочат кон домашните тренери, а фаворити се Вељко Пауновиќ и Славиша Јокановиќ.
Но, има и тренери кои отворено се нудат. Таков е Мехмед Баждаревиќ, некогашниот босански и југословенски репрезентативец.
„Апсолутно би сакал да имам такви играчи. Да се биде селектор на репрезентација како Србија секако ќе ми биде голема чест. Бев селектор во мојата земја три години и бев среќен. Би направил сериозна приказна и проект кој ако дојде до тоа, но за тоа подоцна. Има сериозни кандидати, а ако јас добијам понуда, би прифатил со големо задоволство“, изјави Баждаревиќ за телевизијата „Спорт клуб“.
Баждаревиќ беше селектор на Босна и Херцеговина од 2014 до 2017 година, а како тренер последна работа му беше во француски Генган во сезоната 2020/21.
