Левандовски се јави: Рускиот народ не е виновен, но во ваква ситуација не можам да замислам да играм во Русија

Роберт Левандовски треба да ја предводи полската репрезентација на гостински терен против Русија, во Москва, на бараж мечот на 24. март за пласман на Светското првенство, но и тој и Полјаците притискаат да не се игра во Русија.

„Не можам да замислам во ваква ситуација кога Русија ја напаѓа Украина да играм фудбал таму. Рускиот народ и фудбалерите не се виновни, но не можеме да се преправаме дека ништо не се случува“, вели кралот на стрелците во Европа.

Полска силно притиска мечот да се игра на неутрален терен, а заедно со останатите две селекции, Шведска и Чешка, кои се во тој дел од ждрепката за двата баражи за пат во Катар излегоа со заедничко соопштение и исто барање, да не се игра во Русија.

Русите на ждрепката за двата предвидени баражи имаа среќа и на двата, ако победат против Полска треба да играат на домашен терен.

Првите баражи се на 24. март, датум на кој и Македонија ќе и гостува на Италија, а последниот чин е закажан за 29. март.

Во случај Русија да ја победи Полска, пак треба да игра на свој терен против победникот од мечот меѓу Шведска и Чешка што ќе се игра на 24. март во Солна.

Ако Македонија приреди подвиг во Палермо и ја елиминира Италија ќе игра за настап на Мундијалот повторно на гости на 29. март против Португалија, или Турција.

Само победниците во двата баражи, а ќе бидат три репрезентации ќе играат на Светското првенство во Катар во ноември и декември оваа година.