Иако веќе се блиску до крајот на своите славни кариери, ривалството меѓу Лионел Меси и Кристијано Роналдо и понатаму предизвикува дебати. Двајцата сè уште се активни – едниот во Интер Мајами, другиот во Ал-Наср – и продолжуваат да бркаат голови и трофеи, секој со свој пат кон доминација во истата ера.
Во оваа вечна дебата има луѓе кои никогаш не се двоумеле. Гери Линекер е еден од нив. Англичанецот, денес коментатор, секогаш го избирал Аргентинецот кога ќе му се постави прашањето: кој е подобар?
Сепак, изгледа дека тој избор има последици. Линекер откри во поткастот „Останатото е фудбал“ дека португалскиот напаѓач престанал да го следи на социјалните мрежи.
„Кристијано Роналдо не ме сака баш многу. Не сум го налутил со нешто што сум кажал за него. Само сум искрен и мислам дека Меси генерално е подобар фудбалер. Тој престана да ме следи на ‘Инстаграм’. Ќе преживеам“, рече тој со насмевка.
„Секогаш ќе го сакам Роналдо. Го имам сретнато многупати. Знам дека малку ми е лут, но тоа е нормално. Те молам, Кристијано… јави ми се. Да бидеме повторно пријатели!“, додаде поранешниот играч на Барселона.
