Лион в петок вечер против Јувентус ќе брани предност од 1-0 во реваншот од осминафиналето во Лигата на шампионите, а францускиот тим ќе може да смета и на својот најопасен напаѓач Мемфис Депај. Холанѓанецот пет месеци немаше играно по повредата на лигаментите, а настапи за првпат по долгата пауза пред една седмица во финалето на францускиот Куп против ПСЖ. Тестот беше успешен, Мемфис одигра 80-на минути и сега е подготвен за настап и психолошки, што е голем плус за Лион.
Ако Лион овојпат со Депај во составот, даде еден гол против Јуве, на италијанскиот првак нема да му биде лесно да се пласира на финалниот турнир во Лисабон, бидејќи така ќе треба да постигне три погодоци.
„Првиот меч го гледав од трибините, и горд бев на тимскиот дух. Јуве тогаш не играше добро, но сега ситуацијата е потполно поинаква. Одиграа многу повеќе мечеви од нас, а паузата мене ми помогна пак да бидам на располагање. Подготвен сум“ – изјави Депај.
Сепак, Старата дама е фаворит на хартија, најголемиот проблем за Лион е што тимот е долго време надвор од натпреварувачки ритам, француската лига не продолжи после прекинот, и тоа е шанса за Јуве.
