Напаѓачот на Ливерпул, Коди Гакпо, ќе отсуствува од терените во следните неколку недели. Ова го откри менаџерот на тимот Арне Слот на прес-конференцијата пред утрешниот натпревар со Брајтон. Холанѓанецот има проблем со мускулот, кој ќе го држи надвор од терените одреден период.
Слична е ситуацијата и со Уатару Ендо, чиј проблем, сепак, е во глуждот.
Добрата вест за Арне Слот е враќањето на Федерико Киеза, кој го пропушти гостувањето кај Интер во Лигата на шампионите во текот на неделата.
„Федерико веќе не е болен. Тој тренираше со нас вчера и денес, така што ќе се врати во составот за утрешниот меч. За Ендо и Гакпо ќе бидат потребни неколку недели. Коди има мускулна повреда, додека проблемот на Уата е во глуждот“, рече Слот.
Тој додаде дека медицинскиот тим на Црвените ќе продолжи да го следи и здравјето на напаѓачот Александер Исак, кој доби удар за време на натпреварот со Интер во вторник.
