Веќе неколку месеци трае сагата околу тоа дали Мохамед Салах ќе остане во Ливерпул или еден од најдобрите голгетери на денешницата во следната сезона ќе го гледаме во дрес на друг клуб.
Од 2017 година Салах е во Ливерпул и е главна ѕвезда во тимот. Тој и сезонава игра одлично и е вистински лидер на Црвените, кои се главни фаворити за освојување на титулата во Премиер лигата. Во 30 лигашки дуели, египетскиот репрезентативец има постигнато 27 гола и не само што е најдобар стрелец во Англија, туку е и лидер во трката за освојување на Златна копачка за најдобар стрелец во Европа.
Актуелниот договор на Салах истекува на крајот од сезонава, а од Ливерпул досега немаат официјална понуда за да го задржат на „Енфилд роуд“. Сепак, според последните пишувања на англиските медиуми, Салах е можно да остане во дресот на Ливерпул и во следните две сезони, односно до јуни 2027 година.
Освен Салах, договорите на крајот од сезоната им завршуваат и на Трент Александер-Арнолд и Вирџил ван Дајк, а речиси стоотсто е дека овие двајца ќе го напуштат „Енфилд роуд“ по завршување на оваа сезона.
