Англискиот шампион Ливерпул го одложи планираното враќање на фудбалерите на тренинг, откако клубот сè уште е во длабока жалост поради трагичната смрт на напаѓачот Диого Жота.
Првата група играчи и менаџерот Арне Слот требаше да се појават во тренинг-центарот денеска, за почеток на претсезонските физички тестови. Меѓутоа, сето тоа е одложено, бидејќи клубот се справува со последиците од шокантната трагедија. 28-годишниот Жота и неговиот брат Андре Силва загинаа во сообраќајна несреќа во Шпанија во раните часови во четвртокот.
Утринава, ожалостените граѓани се собраа на комеморација во Португалија, пред погребот на браќата што ќе се одржи во сабота во 10 часот во црквата „Игреха Матрис де Гондомар“ во Сао Козме.
Менаџерот на Ливерпул, Арне Слот, нагласи дека сите во клубот му должат на Жота „единство и поддршка едни на други“.
Во знак на почит, клубот ги спушти знамињата на половина копје, ги затвори сите официјални продавници, музејот и ги откажа фан-турите до понеделник. Отворена е и книга на жалост – физички на трибината „Енфилд Роуд“ и онлајн.
Навивачите продолжуваат да оставаат цвеќиња, шалови и дресови пред импровизираниот споменик пред „Енфилд“, додека слична сцена се гледа и на стадионот „Молинју“ на Вулверхемптон, клубот каде Жота мина три сезони пред да дојде во Ливерпул.
