Англискиот шампион Ливерпул покажува голем интерес за бразилската ѕвезда на Реал Мадрид, Винисиус јуниор, и размислува да достави понуда од 100 милиони евра.
Причината за интересот на Црвените е напнатата комуникација меѓу Винисиус и тренерот на Кралевите, Чаби Алонсо. Сè започна за време на „Ел Класико“, кога Алонсо го замени Винисиус во второто полувреме против Барселона, што не му се допадна на фудбалерот. Иако подоцна се смирија, шпанските медиуми сè уште тврдат дека нивните односи се напнати.
Дополнително, бразилскиот крилен напаѓач бара значително зголемување на платата за да потпише нов договор со Реал Мадрид. Неговиот сегашен договор истекува летото 2027 година, а според последните информации, доколку не се постигне договор, клубот е подготвен да се раздели со играчот.
Тактички, Винисиус би се вклопил совршено на левото крило кај Ливерпул, како природна алтернатива на Мохамед Салах на спротивната страна. Неговата брзина, дриблингот и способноста да ја пробие одбраната би дале поголем баланс и дополнителни опции во офанзивата, особено што клубот бара нови решенија во нападот.
