Ливерпул загуби неочекувано лесно и убедливо со 3:0 на гостувањето кај Брајтон, што го потона уште подолу на табелата 19-кратниот првак на Англија кој е во очигледна криза.
Јирген Клоп по мечот им се извинуваше на навивачите, но тие се незадоволни, а Црвените имаат лош старт на годината, најлош во последните три децении.
На два меча во Премиер лигата се поразени од Брентфорд и од Брајтон, а и во ФА купот не го победија Вулверхемптон во меч што заврши 2:2 и ќе се повтори, но сега на „Молињу“, каде Ливерпул ќе биде гостин.
Одбраната на Ливерпул што беше гранитна и симбол на клубот во последните неколку сезони сега е катастрофална, а примени се 8 гола на трите меча што клубот ги одигра во 2023 година.
Повреден е Вирџил Ван Дајк, но и со него дефанзивата не делуваше сигурно во последно време.
По 18 одиграни натпревари Ливерпул е на осмото место во Премиер лигата со 28 бода, 16 помалку од лидерот Арсенал и тоа со меч повеќе.
